Ыам ыйын 8 күнүгэр Золотарев Н.А. аатынан Боотулуу орто оскуолатыгар РФ норуотун үөрэҕириитин туйгуна, педагогическай үлэ ветерана, «Дети Саха-Азия» норуоттар икки ардыларынааҕы фонд стипендиата, учууталлар Учууталлара, Үөһээ Бүлүү Улууһун уонна Боотулуу нэһилиэгин Бочуоттаах олохтооҕо, СӨ суруналыыстарын Сойууһун чилиэнэ, Н.А. Золотарев аатынан Боотулуу орто оскуолатын Бочуоттаах үлэһитэ, «Үөһээ Бүлүү» хаһыат ытыктанар селькора, физическэй культура уонна спорт ветерана, норуот маастара, элбэх бочуотунай грамоталар, махтал суруктар хаһаайыннара Алексей Алексеевич Николаев “Сэрии тулаайаҕын дьылҕата” диэн саҥа кинигэтин сүрэхтэниитэ буолан ааста.
Алексей Алексеевич – нэһилиэкпит киэн туттар киһибит, холобур оҥостор, ытыктыыр-убаастыыр ытык-мааны кырдьаҕаспыт. Кини барыга бары эргиччи талааннаах, сатабыллаах.
Өр сылларга оскуолабытыгар уруһуй, черчение учууталынан үтүө суобастаахтык үлэлээбитэ, үгүс көлүөнэ кэнчээри ыччаты сырдыкка-кэрэҕэ сирдээбитэ. Эдэригэр спортсмен бэрдэ, тустуунан кыратык дьарыктана сылдьыбыт, Буучугурас тустуутугар кыра ыйааһыҥҥа чемпионнаабыт. Маны таһынан, саахымаччыт бастыҥа, билигин да комплекснай спартакиадаларга нэһилиэгин чиэһин көмүскээн инники кэккэҕэ сылдьара биһигини үөрдэр. Сааһыран баран, суруналыыстыка эйгэтигэр ылсан, улууспут хаһыатыгар селькордаан, нэһилиэгин сонуннарын сырдата турар. Маны таһынан, уруһуйунан дьарыктанан, буойун суруйааччылар, үлэ геройдарын, улууспут киэн туттар тустууга В.И.Степанов-Буучугурас мөссүөннэрин уруһуйдаан үйэтитиитэ биир туспа кэпсээн.
Алексей Алексеевич кэнники сылларга кинигэ суруйуутугар ылыста. Бу саҥа кинигэтэ кини олоҕун, үлэлээн ааспыт кэмнэрин, дьон ахтыытын, суруйбут ыстатыйаларын, нэһилиэгин кэрдиис кэмнэрин кэпсиир.
Бүгүҥҥү үөрүүлээх күнүгэр үйэ аҥарыттан ордук бииргэ буолбут олоҕун аргыһа, тапталлаах кэргэнэ Розалия Лазаревна Николаева, үөрэппит оҕолоро, бииргэ үлэлээн ааспыт коллегалара, алтыһар үөлээннээхтэрэ кэлэн истиҥник кэпсэтэн-ипсэтэн, ааспыты ахтан-санаан эҕэрдэлэрин тиэртилэр. Үөрэппит үөрэнээччилэрэ Боотулуу нэһилиэгин баһылыгын солбуйааччы М.М. Петров, сынньалаҥ киин специалиһа С.Т. Саввинова, оскуолабыт директора С.С. Харбаев, үөлээннээҕэ педагогическай үлэ ветерана М.С. Тебенова, туйаҕын хатарааччы учуутал А. Т. Иванов, алтыһар-ыаллаһар дьоно В.Х. Захаров, А.П.Герасимов, Е.И. Иванов уо.д.а. алгыс тыл бастыҥын анаатылар. “Камелек” компания төрүттээччитэ О.Г. Григорьева куйаар ситиминэн эҕэрдэлээбитэ, ыаллыы сытар Мэйик нэһилиэгиттэн үөлээнэҕэ, педагогическай үлэ ветерана В.А. Федоров, үөрэппит үөрэнээччитэ, Мэйик сүрүн оскуолатын директора Н.А.Саввинов, үөрэппит үөрэнээччилэрэ М.С. Потапова уонна Н.С.Иванова үөрүүнү үллэстэ кэлбиттэрэ тэрээһини олус киэргэттэ.
Күндү киһибитигэр Алексей Алексеевичка уонна кини дьиэ кэргэнигэр кытаанах доруобуйаны, дьолу-соргуну, бигэ туругу баҕарабыт!!!
