Григорий Илларионович Поскачин 1914 сыл кулун тутар 1 күнүгэр Үөһээ Бүлүү улууһун Оноҕоччут нэһилиэгэр сэниэ ыалга төрөөбүтэ. 1934 сыллаахха Бүлүүтээҕи педагогическай техникуму бүтэрэн, боотулуу оскуолатыгар учууталлаабыта. Онтон түөрт сыл Дьокуускай куоракка национальнай оскуолаҕа, педтехникумҥа учууталлаабыта. 1936 сыл ахсынньытыттан 1938 сыл балаҕан ыйыгар хаайыллыар диэри Саха сиринээҕи кинигэ издательствотыгар уус-уран литература отделыгар эрэдээктэрдээбитэ. Бастакы хоһоонун 19 саастааҕар Боотулууга суруйбута. Үөрэнэ сылдьан, Бүлүү куоратынааҕы «Кыайыы кыымнара» литературнай куруһуокка дьарыктаммыта. 1933 сыл «Кыайыы кыымнара» диэн хомуурунньукка икки хоһооно: «Ударник комсомол», «Ыллыам» киирбиттэрэ. Григорий Поскачин хоһоонноро, ыстатыйалара «Бэлэм буол», «Эдэр большевик», «Кыым» хаһыаттарга, ону таһынан: 1935 с. «Саас сардаҥата», 1937 с. «Кыайыыга», 1938 с. «Уус-уран литература» диэн эдэр суруйааччылар хомуурунньуктарыгар бэчээттэммиттэрэ.
Григорий Поскачин хоһооннорун бастакы хомуурунньуга 1936 с. «Айылҕа уһуктуута» диэн ааттанан 25000 ахсаанынан Дьокуускайга И.Д. Винокуров — Чаҕылҕан редакциятынан бэчээттэнэн тахсыбыта.
1937 с. Г.Поскачин кыра үөрэхтээх дьоҥҥо анаан «Саха литэрэтиирэтэ» диэн кинигэни хомуйан оҥорбута. Кинигэҕэ 40-ча суруйааччы айымньыта киирбитэ.
1938 с. «Эдэр большевик» хаһыат кулун тутар 27 күнүнээҕи нүөмэригэр «Кинигэни көрүү» диэн ыстатыйаҕа бу кинигэ сытыы кириитикэҕэ тардыллыбыта. Биллибэт ааптар Г.Поскачины «буржуазнай националистары» (Өксөкүлээх Өлөксөйү, Николай Неустроевы, Суорун Омоллоону) арбааһыҥҥа буруйдаабыта, «кинигэ советскай былаас политикатыгар сөп түбэспэт, буортулаах» ис хоһооннооҕун ыйбыта.
1938 с. Г.Поскачин 23 саастааҕар «Босхоҥ Бэлгэдьэ. Албын Курулуу» диэн орто саастаах оҕолорго остуоруйа кинигэтэ Москубаҕа бэчээттэнэн тахсыбыта.
1938 с. Г.Поскачин ССРС Суруйааччыларын союһугар чилиэнинэн ылыллыбыта.
1938 с. балаҕан ыйын 9 күнүгэр Г.Поскачин уус-уран литература редакторынан үлэлии сырыттаҕына националистическай , контрреволюционнай тэрилтэ чилиэнин быһыытынан культурнай фроҥҥа куорҕаллыыр үлэни ыытыыга буруйдаабыттара. 24 эрэ саастаах эдэр киһи инникигэ кэскилэ сарбыллыбыта, олоҕо огдолуйбута, аата-суола алдьаммыта.
Г.И.Поскачин РСФСР Урдуку суутугар ааһыммыта.
РСФСР Урдуку суутун холуобунай коллегиятын 1939 с.ахсынньы 23 күнүнээҕи быһаарыытынан холуобунай дьыалата тохтотуллубута уонна хаайыыттан 1940 с. олунньу 1 күнүгэр босхоломмута.
Куоракка үлэ булбакка уонна доруобуйата айгыраан, дойдутугар Боотулууга, онтон Үөһээ Бүлүүгэ кылгас кэмҥэ учууталлаабыта.
1943 с. 29 сааһын ситэ туолбакка сылдьан, олунньу 10 күнүгэр өлбүтэ. Хочокко Өргүөт диэн көлүйэ таһыгар көмүллүбүтэ.
2011 с. төрөөбүт алааһыгар, Хочот эбэ үрдүк кырдалыгар Григорий Илларионович Поскачиҥҥа аналлаах өйдөбүнньүк бэлиэ туруоруллубута.
