Руфов Семен Титович — Сэмэн Руфов — бэйиэт, тылбаасчыт, саха норуодунай суруйааччыта, ССРС суруйааччыларын Сойууһун чилиэнэ.
1927 сыллаахха ахсынньы 5 күнүгэр (сорох дааннайынан ахсынньы 7 күнүгэр) Саха АССР Үөһээ Бүлүү оройуонугар Тамалакааҥҥа төрөөбүтэ.
1955 сылтан бэчээттэнэр. Хоһооннорун бастакы кинигэтэ “Кэл, олор, кэпсэтиэх” 1959 сыллаахха тахсыбыта. Хоһоонноругар уонча кинигэлээх, ону таһынан очеркалара, кэпсээннэрэ, ахтыылара, эсселэрэ, резенциялара хас да кинигэнэн бэчээттэммиттэрэ. Кини поэзията лириичэскэй тосхоллоох, сырдык көрдөөх-нардаах, ылланар ырыалардаах, эпиграмма маастара. Дьээбэтэ-хообото “Дьээбэтинньик” (1998 с.), “Зыр-зыр” (2002 с.) диэн кинигэлэригэр киллэриллибитэ.
Боотулуу модельнай библиотекатыгар кэлэн Сэмэн Руфов кинигэлэрин ааҕыаххытын сөп.
Күндү ааҕааччылар! Бүгүн эһигини «Таптыыр дойдум» диэн Сэмэн Руфов хоһооннорун сборнигын кытары билиһиннэрэрбитин көҥүллээн.
Таптыыр дойдум
Бэс чагда дьэҥкэрэн ырааһын!
Сааскы күн чаҕыллаан сылааһын!
Уоскутар бу нуурал абылаҥ,
Уһуктар иэйиинэн уйулҕаҥ…
Сардааналар тылыннылар,
Сандаарыччы көрдүлэр –
Бары тыыннаах харамайдар
Балысханнык үөрдүлэр.
Сардаана, кыыһа тэтэрэр
Сарсыардааҥы сибэкки –
Күн тахсыыта күлэр-үөрэр,
Күлүмүрдүүр эбиккин
Үрүҥ хаар барахсан
Үллүктүү түспүккүн,
Үрүҥ хаар, кылбайа сыттаххын!
Олоҕуҥ сырдыгын, ырааһын, үтүөтүн
Умайар урсуҥҥар булабын.
Алааска от-бурдук үүнүүтэ,
Мэччийэр үөр сылгы үөһүттэн
Кулунчук быыппаста сүүрүүтэ –
Барыта күн уотун күүһүттэн.
