Икки Ленин уордьаннаах Бүтүн Россиятааҕы бастакы пионерскай тэрилтэ 1922 сыллаахха Москваҕа тэриллибитэ. Ленинскэй комсомол бойобуой уонна үлэҕэ үтүө үгэстэригэр иитиллибит эдэр ленинецтэр тэрилтэлэрин историята – бу ханнык баҕарар көлүөнэ оҕо сааһын кэрэ-бэлиэ түгэннэрэ.

Пионердар сүрүн атрибуттарынан барабаан, кыһыл хаалтыс, пионерскай значок, горн, дружина знамята буолара. Саха сиригэр пионерскай тэрилтэ 1924 сыллаахха тэриллибитэ. Кыһыл хаалтыстаах оҕо саастарын сырдык өйдөбүлүнэн буолбут оччотооҕу кэми аҕа саастаах көлүөнэ киэн тутта кэпсииллэр.
1922 сыллаахха Арассыыйа хомсомуолун кэмпириэнсийэтигэр пионер этэрээттэрин тэрийии туһунан быһаарыы ылыныллыбыт. Сэбиэскэй Сойууска пионер тэрилтэтэ олохтоммут күнүнэн ааҕыллар. Бу күн ССРС бүттүүнүн үрдүнэн оскуолаларга «Зарница» оонньуу, араас күрэхтэһиилэр буолаллара, улахан кутаа уот оттуллара, сорох оҕолору пионерга ылаллара. Саамай кылаабынайа, оччотооҕу пионерскай тэрилтэлэр ыччаты иитиигэ төрөөбүт дойдуга тапталы, патриотическай өйү-санааны ииппиттэрэ буолар. Билиҥҥи олохпут тосту уларыйбыт, сиэр-майгы сатараабыт кэмигэр урукку пионердар олохторо, ыыппыт идеологиялара чиэс, суобас өрө тутуллуута билиҥҥи ыччакка үтүө холобур эрэ буолан, аныгы ыччаты үлэҕэ көҕүлүүргэ бигэ тирэх, өйөбүл буолуон сөп.
Күн бүгүн кэнчээри ыччаты иитиигэ күннэтэ кыһаллар оҕо түмсүүтүн салайааччылара, тэрийээччи-педагогтар уруккуну умнубакка, пионерия үтүө үгэһигэр тирэҕирэн айымньылаахтык үлэлииллэр, оҕо хамсааһынын саҥа таһымҥа таһаарарга дьулуһаллар.

Бырааһынньыгынан, урукку пионердар!

Көлүөнэ икки ардыгар ситим уонна ытыктабыллаах сыһыан баар буола турдун!