Ыам ыйын 3 күнүгэр, Мария Матахова төрөөбүтэ 85 сылын бэлиэтиир “Мин санаам – саһарҕа хоптото” диэн тэрээһин Боотулууга буолан ааста. Оскуола үрдүкү сүһүөх оҕолоро (Снежана Егорова, Сардаана Корякина, Чөмчүүнэ Неустроева), Боотулуутааҕы “Радуга” оҕо уһуйаанын үлэһиттэрэ (сэб. Е. Г. Долгунова) Мария Николаевна чабырҕахтарын, хоһооннорун ааҕан киэһэбитин киэргэттилэр. Боотулуутааҕы О. В. Григорьева аатынан Норуот тыйаатыра М.Н. Матахова суруйуутунан “Хобуоччу тоһо”, “Куколка Куола” диэн сыаҥкаларын туруорда. Васильев Василий Лукич, Буртахова Варвара Иннокентьевна Мария Матахова айар үлэтин туһунан тыл эттилэр, урукку кэмнэргэ кини суруйууларыттан элбэх үлэ сыанаҕа спектакль буолан турбутун ахтан-санаан аастылар. Биир дойдулаахпыт суруйааччы, журналист, элбэх чабырҕах ааптара Мария Матахова олоҕун, айар-үлэтин туһунан билиһиннэрдибит, кэпсээтибит. Үөһээ Бүлүүттэн кэлбит ахтыылары быһа тардан ааҕан билиһиннэрдибит. Пантелеймон Степанов аудиоҕа устан ыыппыт ахтыытыттан быһа тардан иһиттибит. Отучча сыллааҕыта аахпыт чабырҕаҕын күн баччааҥҥа диэри өйүгэр тута сылдьарын сөхтүбүт, сэргээтибит. Тимофей Шестаков-Чоххуруос, Мария Матахова хоһоонноругар айбыт матыыптарынан, аудиоҕа устан ыллаан ыыппытын олус астына иһиттибит. Маны таһынан алын кылаас оҕолоругар ыытыллыбыт чабырҕах күрэҕэ түмүктэннэ. 2, 3, 4 кылаас оҕолоро (кылаас салайааччылара А. З. Иванова, А. И. Копылова, С. М. Спиридонова) кыттаннар Добун суруктары, сэмэй бириистэри туттулар. Оҕолор кылгас кэм иһигэр чабырҕах ааҕыы уустук ньыматын ылынан аахпыттара олус үөрдэр. Түмүккэ, кыттыыны ылбыт, тэрээһини киэргэппит бар дьоммутугар Махтал суруктары туттардыбыт.
М. Н. Матахова кэриэһигэр анаммыт литературнай киэһэ бэрт сэргэхтик ааста.
