Тыа хаһаайыстыбатын бэтэрээнэ, Үөһээ-Бүлүү оройуонун хас да төгүллээх чөмпүйүөн суоппара Алексеев Федот Николаевич оҕолорго сэбиэскэй кэм саҕаттан үлэтин-хамнаһын кэпсээтэ, үлэни өрө тутан дойдубут сайдарыгар төһүү күүс буолуҥ диэн баҕа санаатын тириэртэ.
“Үлэ Албан аат ÌII истиэпэннээх” уонна ” Норуоттар Доҕордоһуулара” уордьаннардаах тырахтарыыс Максимов Николай Михайлович үлэтэ Көтөрдөөх сайдыытыгар сүҥкэн оруоллааҕын сиэнэ Андриан Казаков, балта Капиталина Спиридонова билиһиннэрдилэр.
Нэһилиэкпит биир бастыҥ механизатора Степанов Николай Васильевич сиэннэринээн “Сайыҥҥы биир күн дьылы аһатар” диэн бэргэн этиини тутуһан, былааннаахтык оттуулларын сиэнэ Юлиан Степанов олус бэрткэ кэпсээтэ.
Боотулуубут үлэһит дьонун үтүө ааттарын үйэтитэргэ, кинилэр үлэлээбит үлэлэрин, ситиспит үрдүк ситиһиилэрин холобур оҥостор сыаллаах тэрээһини тэрийсибит оскуола коллективыгар махталбын тириэрдэбин.
Библиотекарь А.И. Софронова
