Российскай Федерация уонна Саха Республикатын культуратын үтүөлээх үлэһитэ, Иван Гоголев-Кындыл аатынан литературнай бириэмийэ лауреата, элбэх кинигэ ааптара, журналист, публицист, тылбаасчыт, учуутал… Кэрэҕэ дьулуур уонна таптал истиҥ иэйиитин нарыннык хоһуйбут биллиилээх Норуодунай поэт Василий Тарасович Сивцев 1933 сыллаахха ахсынньы 22 күнүгэр Үөһээ Бүлүү улууһугар Боотулуу нэһилиэгин Дьаҕыры диэн күөлүгэр төрөөбүтэ. Поэт бэйэтэ кэпсээбитинэн, тылынан уустаан-ураннаан айар талаана Боотулуу оскуолатыгар П. С. Прокопьев тэрийбит “Сардаҥа” эркин хаһыатыгар, түмсүүтүгэр арыллыбыт эбит. Поэт төрөөбүт Боотулуутун “дьол биһигэ”, “төрөөбүт күндү Боотулуум”, “Кыталыктаах дойдум” диэн ааттыыра, оҕо сааһа ааспыт Дьаҕыры күөлүн ахтара, ынах маҥырыырын, оҕус айаатыырын санаан элбэх хоһоонноругар, сонеттарыгар, ыстатыйаларыгар суруйбута. Василий Тарасович баара буоллар быйыл 90 сааһын туолуохтаах этэ. Хомойуох иһин бу бэлиэ күҥҥэ сырдык олоҕо тиийбэтэ. Быйыл 2023 сылга, Боотулуу нэһилиэгин Көтөрдөөх учаастагар, үс Норуодунайдар төрөөбүт түөлбэлэригэр, улахан үбүлүөйдээх Ыһыах буолаары турар. Ол онно олоҕуран, бүгүн эһиэхэ анаан Василий Тарасович сонетын дьөрбөтүгэр анаан, РФ норуотун үөрэҕириитин туйгуна А. А. Николаев уруһуйдаабытын, эһиги көрүүгүтүгэр таһаарабыт.
Мин эмиэ эргиллэн бу кэллим эһиэхэ Минньигэс салгыннаах төрүт ыыр сирдэрим: Көтөрдөөх суон тиитэ, Дьаҕыры күөл бэһэ, Көй үгүс уоттардаах Боотулуу - биһигим.
Көтөрдөөх, эн баар буолаҥҥын Дойдулаах, дьоннордоох курдукпун, Тирэҕим, мин үөрүүм - эн бааргын.
Ханнаҕыный күндү өтөхтөөх, Ханна да суох дириҥ куталаах, Хара маһыттан ылар уулаах Хаарыан дойдум миэнэ Көтөрдөөх.
Бараах үөрэ, мороду моргуора, Аймыыра оҕотук дууһабын, Төрөөбүт алааһым салгынын.
Ыраах көстөр саҕаҕы үрдүнэн Үрүҥ хоптолор үөрдүһэн Тус хоту көтө турбуттарын Тулаайахсыйбыт дууһам сайыһан, Сүрэхтиин-быардыын тардыһан Ырааҕы көрө сатыыбын.
Төрөөбүт алааһым салгынын, курустаал таастыы лыҥкыныырын сарсыарда элбэхтик истибитим, Алааспыттан үөрэн истибитим. Улахан өрүс кытылыгар кылыйбатаҕым, Үрэх баһыгар, куталаах күөлгэ үөскээбитим, Дулҕа быыһыгар, ынах ыллыгар сүүрэкэлиирим, Ыраах айаҥҥа, балыккка да ымсыырбатаҕым.
