Амыдаев Николай Данилович – СӨ народнай худуоһунньуга, Арассыыйа худуоһунньуктарын Сойууһун чилиэнэ, педагогическай үлэ бэтэрээнэ, орто анал үөрэхтээһин туйгуна. «Үлэҕэ уһулуччу ситиһиилэрин иһин” мэтээлинэн наҕараадаламмыта, Үөһэ Бүлүү Боотулу сэлиэнньэтин бочуоттаах олохтооҕо. Үөһээ Бүлүү биир уулуссатыгар аатын үйэтитэн «Н.Д. Амыдаев» диэн аат иҥэриллибитэ.
Николай Данилович Үөһээ Бүлүү Боотулутугар төрөөбүтэ. 7 кылааһы бүтэрэн баран Үөһээ Бүлүүтээҕи маһы таҥастыыр кэмбинээккэ бастаан үөрэнээччинэн, онтон мас ууһунан үлэлээбитэ. 1952-1955с.с. Сэбиэскэй аармыйа кэккэтигэр Кытай народнай республикатыгар сулууспалаан баран салгыы 6 разрядтаах мас ууһунан үлэлээбитэ. Киэҥ-куоҥ тоҕус да тоҕус кэмэйдээх саҥа мас дьиэ туттан ийэтин Дария Ивановнаны Боотулууттан көһөрөн аҕалан олорбуттара. Дьиэ таһыгар булуус, хотон туттан,ынах- сүөһу ииттэн ыар – бааччы олорбуттар.
1960-1965с.с. Дьокуускайдаҕы художественнай училище “Художественная обработка кости и дерева” салаатыгар үөрэнэн, “мастер-художник и преподаватель рисования в общеобразовательной школе” идэтин баһылаабыта. 1966с. Үөһээ Бүлүү киэһээҥи оскуолатыгар черчение учууталынан, онтон 1967с. П.П.Романов аатынан Дьокуускайдааҕы художественнай училищеҕа 20 сыл устата эҥкилэ суох үлэлээбитэ.
Сэбиэскэй буойуҥҥа анаммыт пааматынньыктары оҥорон 1965 с. Үөһээ Бүлүүгэ, 1966 с. Ньурбаҕа Кыайыы болуоссаттарыгар туруорбута. Үөһээ Бүлүү сэлиэнньэтин сынньалаҥ уонна култуура пааркатын аллейатыгар Социалистическай үлэ дьоруойдарыгар С.В. Данилов, А.Н. Саввинов, С.И. Васильев бүүстэрин оҥорбута. Билигин ол оҥоһуктар оройуоннааҕы түмэл (музей) таһыгар туруоруллубуттара. Исидор Барахов бастакы бүүһүн кини аатынан ааттаммыт оскуола тэлгэһэтигэр оҥорон туруорбута.
1966 с. Николай Данилович олоҕун аргыһын Парасковья Семеновнаны (Николаева) көрсөн ыал буолбуттара. Кэргэнэ Ньурба остолобуойугар 5-с разрядтаах асчытынан, ол кэннэ Дьокуускайга оҕо уһуйааныгар онтон орто оскуолаҕа үлэлээбитэ.
Дьиэ кэргэн 1967с. Дьокуускай куоракка көспүтэ. Сүрдээх ыалдьытымсах, өрүү минньигэс иҥэмтэлээх өлгөм астаах, дьоҥҥо үтүө сыһыаннаах, өйүүр – көмөлөһөр сырдык санаалаах эдэр ыал утуу-субуу икки Василий диэн уол, Мария диэн кыыс оҕоломмуттара.
