Хас биирдии киһи олоҕор саамай күндү, саамай чугас, истиҥ, улахан суолталаах – дьиэ кэргэнэ буолар. Киһи олоххо сыһыана, тус көрүүтэ, майгыта-сигилитэ, саҥаны билиигэ-көрүүгэ тардыһыыта – барыта аан маҥнай дьиэ кэргэнин иһиттэн саҕаланара саарбаҕа суох. Төрөппүттэрбит остуоруйаларын истэн, дьоммут кинигэ ааҕалларын көрөн, аан маҥнай ааҕыы умсулҕаныгар умсабыт, кинигэ кэрэ эйгэтин кытта билсэбит… Бэйэтэ ааҕар, билиигэ, саҥаҕа, кэрэҕэ тардыһар төрөппүт, оҕотун олоҕор эмиэ маҥнайгы олугу уурар.
Ыам ыйын 15 күнүгэр бэлиэтэнэр дьиэ кэргэн күнүгэр тирэҕирэн, Боотулуу нэһилиэгин олохтоох бибилитиэкэтэ, бүгүн ыам ыйын 16 күнүгэр, “Ааҕыыга таптал – дьиэ кэргэнтэн саҕаланар” диэн интеллектуальнай оонньууну, дьиэ кэргэнинэн күрэхтэһиини тэрийэн ыытта. Күрэххэ барыта 6 алын сүһүөх оскуолатын оҕолоро төрөппүттэрин кытта кытыннылар. Күрэхтэһии хаамыытын оҕолор учууталлара, бииргэ үөрэнэр доҕотторо кэлэн көрдүлэр, мааны ыалдьыт буоллулар.
Күрэхтэһиибит оҕолор төрөппүттэрин кытта хамаандаларын ааттыылларыттан, дьиэ кэргэннэрин девиһин билиһиннэриилэриттэн саҕаланна. “Бичик”(Золотарева А. Р. кыыһа Яналыын 3 кылаас), “Роза” (Егорова О. М. балта Эльзалыын, 1 кылаас), “Күнчээн” (Копылова А. И. уола Сашалыын, 3 кылаас), “Күн оҕолоро” (Васильева К. З. кыыһа Мичийэлиин, 1 кылаас), “Ньургуһун” (Евдокимова М. А. кыыһа Амелиялыын, 1 кылаас), “Ромашка” (Огочонов К. Н., Докторова А. С. кыыстара Леналыын, 1 кылаас) диэн ааттаах хамаандаларга арахсан, 5 араас түһүмэххэ куоталаһыыбыт саҕаланна. Ол курдук, маҥнай оҕолор төрөппүттэрин кытта куолаан билэр остуоруйаларын ааттарын суруйдулар. Саамай элбэх остуоруйаны (24)”Бичик” уонна “Ромашка” хамаандалар суруйан тэҥнэстилэр. Салгыы төрөппүттэр бэйэлэрин билиилэрин тургутар, саха тылыгар уонна литературатыгар сыһыаннаах, араас ыйытыыларга хоруйдаан күөн көрүстүлэр. Үһүс түһүмэххэ, оҕолорго анаан библиотека оҥорбут “Остуоруйа дойдутугар айан” диэн хартыынанан викторина буолла. Оҕолор бары көхтөөхтүк үөрэ-көтө бэриллибит сорудаҕы толордулар. Салгыы хамаандалар остуоруйа ааттарын уонна ааптардарын таба булан туруорууга бириэмэҕэ куоталастылар. Оҕолор да, төрөппүттэр да бэйэлэригэр туох эрэ саҥаны билбиттэрэ киһини үөрдэр эрэ. Түмүктүүр бэһис түһүмэххэ, төрөппүттэри мүнүүтэҕэ аахтарыы буолла. Биир мүнүүтэ иһигэр сахалыы тиэкиһи ааҕан төрөппүттэр оскуола саастарын санаан аастылар. Саамай элбэх тылы ааҕан (188 тыл) Анна Радиевна (“Бичик” хамаанда) аахта үөрүүтэ үрдээтэ.
Библиотека үлэһитигэр көмөлөһө, тэрээһини ыытыһа, оскуола иитэр үлэҕэ директоры солбуйааччыта Нарыйа Петровна сылдьыста. Түмүк тахсыар диэри кыттааччылар, ыалдьыттар “Аан дойду остуоруйалара” кинигэ быыстапкатын көрдүлэр, хаартыскаҕа түстүлэр.
Бүгүҥҥү дьиэ кэргэҥҥэ аналлаах, ааҕыыны көҕүлүүр сыаллаах күрэхпит түмүгүнэн, бука бары кинигэ бэлэхтээх, минньигэс сакалааттаах, үчүгэй настарыанньалаах тарҕастылар.
Үһүс миэстэни “Роза” уонна “Күн оҕолоро” хамаандалар очколара тэҥнэһэн үллэһиннилэр. 2 миэстэни “Күнчээн” хамаанда, 1 бочуоттаах миэстэни “Ромашка” хамаандалар ылан үөрүүлэрэ үрдээтэ. Күрэхпит “Муҥутуур кыайыылаахтара” ааты “Бичик” хамаанда ылла.
Бүгүҥҥү тэрээһиҥҥэ кыттыбыт оҕолорго, кинилэр төрөппүттэригэр, учууталларыгар улахан махталбытын тиэрдэбит! Өссө да бибилитиэкэ ыытар тэрээһиннэригэр көхтөөхтүк кыттыахтара диэн эрэнэбит!
