Күн сиригэр ийэттэн ордук күүскэ таптыыра киһиэхэ туох да суох. Дьэ, ол иһин да ийэ Күн күбэй ийэ диэн былыр былыргыттан ааттанар, күҥҥэ тэҥнэнэр эбит буоллаҕа. Ийэҥ баар буолан, күн сирин көрдөҕүҥ, кини минньигэс өлбөт мэҥэҕэ тэҥнээх үүтүн иһэн улааттаҕыҥ.
Боотулуу нэһилиэгин күн күбэй ийэлэрэ барахсаттар — Саха сирин бары улуустарынан олорор-үлэлиир тыһыынчанан ааҕыллар бүгүҥҥү боотулуулары тэниппит-ууһаппыт саамай ытык дьоннорбут буолаллар.
Биһиги нэһилиэк уоннуу, уонтан тахсалыы оҕону төрөтөн, бүөбэйдээн, киһи-хара оҥортообут үтүөлээх Күн күбэй Дьоруой-Ийэлэрбит.
Корякина Марина Гаврильевна
Үөһээ Бүлүү оройуонугар бастакынан Герой Ийэ үрдүк аата Корякина Марина Гаврильевнаҕа иҥэриллибит.
Марина Гаврильевна Боотулууга 1891 сыллаахха Буурта Хабырыллата уонна Кутаҕайаан кыыһа Маарыйа дьиэ кэргэнигэр 6-с оҕонон төрөөбүт. Корякин Егор Прокопьевичтыын ыал буолан Ыарыкчааҥҥа Дьабыга олорбуттар, 10 оҕоломмуттар. Кэтэх хаһаайыстыбаларыгар сылгы, сүөһү тутан олорбуттар. Сэрии кэминээҕи сут дьылларга элбэх киһи үрүҥ тыынын өрүһүйбүттэр.
Герасимова Варвара Михайловна
1923 сыллаахха үлэһит — бааһынай дьиэ кэргэҥҥэ Чинэки сиригэр Балаҕаннаах диэн күөлгэ төрөөбүт. Аҕата — Герасимов Михаил Егорович, ийэтэ — Семенова Евдокия Петровна 4 оҕону төрөтөн, көрөн-харайан улаатыннарбыттар.
Сэрии бүтэр сааһыгар 1945 сыл муус устар ыйга Григорьев Иннокентий Дмитриевичка кэргэн тахсан, Боотулууга олохсуйбуттар. Биэс уол, биэс кыыс оҕону төрөтөн, улахан дьиэ кэргэн буолбуттар.
Анисимова Акулина Петровна
1928 сыллаахха Көтөрдөөххө Петр Григорьевич уонна Варвара Степановна Ылаховтар дьиэ кэгэҥҥэ төрөөбүт. 8-с бииргэ төрөөбүттэр. Боотулууга 7 кылаастаах оскуоланы бүтэрэн баран, Кэнтиккэ үлэлээбит. 1948 сыллаахха олоҕун аргыһын Анисимов Иван Петровиһы көрсөн, ыал буолбуттар, 11 оҕоломмуттар. Холкуоска, онтон сопхуоска сүөһү үлэтигэр, кэлин гаражка остуораһынан улэлии сылдьыбыт.
Николаева Вера Петровна
1932 сыллаахха Боотулууга төрөөбүтэ. Аҕата 1942 сыллаахха сэриигэ барбытын кэннэ 2 ыйынан ийэтэ ыалдьан өлбүтэ. Аҕата сэрииттэн төннүбэтэҕэ, 2 кыыс тулаайах хаалбыттар.
Николаев Федор Даниловичка кэргэн тахсан 11оҕоломмуттар. Холкуоска ыанньыксыттаабыта, кэлин балыыһаҕа үлэлээбит.
Иванова Мария Кирилловна
Боотулуу нэһилиэгэр 1934 сыллаахха төрөөбүт. Кыра эрдэҕиттэн тулаайах, ииппит ийэтэ Федорова София Ивановна. Кэргэнэ Евдокимов Петр Петровичтыын 10 оҕоломмуттар. Оҕо саадыгар ньээньэнэн, кэлин бибилэтиэкэҕэ остуораһынан үлэлээбит.
Деллохова Анна Михайловна
Михаил Федотович уонна Евгения Гаврильевна Деллоховтар дьиэ кэргэннэригэр Боотулу сиригэр Туоһурдьааҥҥа 1925 сыллаахха төрөөбүт, бииргэ төрөөбүттэр уон алталар, тоҕус уол, сэттэ кыыс.
Константинов Петр Игнатьевичтыын ыал буолан 11 оҕоломмуттар, 6 кыыс, 5 уол. Холкуос, сопхуос араас үлэтигэр үлэлээбит, кэлин рабкоопка атыыһытынан үлэлээбит.
Яковлева Анна Ивановна
Анна Ивановна 1930 сыллаахха Чинэкигэ төрөөбүт. Ийэтэ — Агафья, Иван Яковлевтар.
1954 сыллаахха олоҕун аргыһын Уйбаанныын ыал буолан, 10 оҕону төрөтөн, иитэн-бүөбэйдээн, үөрэттэрэн, киһи гынаттабыттар. Холкуоска, сопхуоска араас үлэҕэ сылдьан баран, балыыһаҕа, оҕо саадыгар үлэлээбит, кэлин интэринээккэ повардаабыт.
Николаева Анна Петровна
Анна Петровна Владимир Степановичтыын ыал буолан 13 оҕоломмуттар, 7 кыыс, 6 уол. Анна Петровна өр сылларга оҕо саадыгар иһит сууйааччынан үлэлээбитэ.
Лаппарова Мария Алексеевна
III Үөдүгэй нэһилиэгэр (билигин Дүллүкү нэһилиэгэ) Арбаҥда диэн Үрэн таһыгар баар сиргэ 1928 сыллаахха Алексей Иванович уонна Варвара Прокопьевна Лаппаровтарга бастакы оҕонон төрөөбүт. Бииргэ төрөөбүттэрэ Федор, Раиса, Роза, Григорий. Аҕата сэриигэ сураҕа суох сүппүт.
Мария Алексеевна Поскачин Семен Герасимовиһы кытта ыал буолан 10 оҕону төрөтөн, 2 оҕону иитэн улаатыннарбыттар.
Боотулууга Сельскай Потребобществоҕа кылаабынай бухгалтерынан үлэлээбитэ. 1956 сыллаахха «ССРС эргиэнин туйгуна» наҕарааданы ылбыт.
Евдокимова Мария Семеновна
1945 сыллаахха Мэйик нэһилиэгэр соҕотох ийэҕэ төрөөбүт. Оскуоланы 1963 сыллаахха бүтэрэн баран 1964 сыллаахха Евдокимов Петры кытта ыал буолбуттар. 12 оҕоломмуттар.
Киинэ мэхээньигин үөрэҕин СПТУ-7 бүтэрэн, 13 сыл үлэлээбит, онтон араас үлэлэргэ сылдьыбыт.
Алексеева Марфа Николаевна
Марфа Николаевна 1937 сылаахха Сургуулук нэһилиэгэр төрөөбүт. Элбэх бииргэ төрөөбүттэртэн соҕотох хаалбыт. Алексеев Роман Никоновиһы кытта 11 оҕоломмуттар.
Олохтоох балыыһаҕа саньытаарканан үлэлээбит.
Максимова Анна Николаевна
Анна Николаевна 1941 сыллаахха үлэһит-бааһынай Максимовтар дьиэ кэргэҥҥэ Маҥаас нэһилиэгэр төрөөбүт. 1960 сыллаахха Максимов Семен Иннокентьевиһы кытта ыал буолан 10 оҕоломмуттар.
Анна Николаевна дьааһылаҕа таҥас сууйааччынан, кэлин балыыһаҕа саньытаарканан үлэлээбит.
Спиридонова Раиса Егоровна
Раиса Егоровна 1946 сыллаахха Боотулуу нэһилиэгэр төрөөбүт. Спиридонов Василий Спиридоновичтыын ыал буолан 10 оҕоломмуттар.
Сибээс узелыгар монтерунан, балыыһаҕа, аптекаҕа саньытаарканан үлэлээбит.
Москарова Мавра Максимовна
Мавра максимовна 1932 сыллахха Түүкээҥҥэ Тиргэлээх диэн сиргэ төрөөбүт. 1950 сыллаахха Догоров Илья Герасимовиһы кытта холбоһон ыал буолан 10 оҕоломмуттар.
Мавра Максимовна холкуос, сопхуос араас үлэтигэр үлэлээбит, кэлин дьааһылаҕа үлэлээбит.
Титова Ирина Даниловна
Ирина Даниловна Көтөрдөөххө Титовтар дьиэ кэргэҥҥэ тохсус оҕонон төрөөбүт. Бастакы кэргэниттэн Афанасьев Федор Егоровичтан икки кыыстаах. Ыалдьан өлбүтүн кэннэ, сэрииттэн кэлбит Корякин Архип Михайловичка кэргэн тахсан 8 оҕоломмуттар. Онон 10 оҕолонон баран уордьана суох хаалбыт Герой Ийэ. Кыра кыыһа 1 сааһын туолбакка корь ыарыыттан өлөн хаалбыт.
«1941-1945 сс. Аҕа дойду сэриитигэр килбиэннээх үлэтин иһин» мэтээлинэн наҕараадаламмыт.
