Аалай өҥнөөх хаалтыһым
Моойбор кыыһа сыстара,
Сирдээн сиэтэр аргыһым
Суолбун ыйа сытара.
Кэккэлэһэ тураммыт
Андаҕары этэрбит,
Сөлүүт биэрэн бараммыт
Тэҥҥэ чиҥник хаамарбыт.
Тимур аатын ыларбыт
Дьоҥҥо көмө буоларбыт.
Кырдьаҕаһы таларбыт
Маһын, отун таһарбыт.
Айылҕалыын алтыһан
Походтарга сылдьарбыт,
Ыллык ыыры үктээммит
Саҥа суолу тэлэрбит.
Кутаа тула олорон
Хортуосканы үтэрбит.
Араас ырыа толорон
Оҕо сааһы туойарбыт.
Дойдубутун таптыырбыт
Дьоруойдары арбыырбыт.
Улаатаары ыксыырбыт
Хоодуот буола сатыырбыт.
Оҕо сааспыт биир кэрэ,
Үтүөкэннээх кэмнэрэ,
Көнө суолга киллэрэ,
Үөрэппитэ биллэрэ.
Маннык дьоһун тэрээһин,
Сүтүө суоҕа сирдээһин,
Бар дьон сөпсөөн сөргүтүө,
Дойду ону сөбүлүө.
Н. Пахомов
19.05.2025 с.
