Боотулуу нэһилиэгин библиотеката, ыам ыйын 27 күнүгэр, Өрөспүүбүлүкэҕэ 6 төгүлүн ыытыллар “Кинигэ күүһэ” (#СилаКниги) аахсыйаҕа быйыл эмиэ кыттыыны ылла. Аахсыйа Оҕо саас уонна Дьиэ кэргэн сылыгар ананан ыытылынна, онон ааҕааччы бу сырыыга оскуола саастаах оҕо буолла. Аахсыйаҕа Боотулуу орто оскуолатын 7 кылааһын үөрэнээччитэ Лилия Лазарева, Николай Якутскай «Кыыллар доҕордоһуулара» диэн оҕолорго анаммыт кэпсээнин аахта. Доҕордоһуу туһунан, уус-уран тыллаах биир дойдулаахпыт, суруйааччы Николай Якутскай олус долгутуулаахтык, киһи дууһатын таарыйардык суруйбут кэпсээнин оҕолор сэҥээрэн, сэргээн иһиттилэр. Ааҕыы кэннэ кэпсээн тула ырытыы, кэпсэтии буолла. Сайыҥҥы каникул саҕаламмытын да үрдүнэн, оҕолор тэрээһиҥҥэ кэлэн көхтөөхтүк кыттыбыттара үөрдэр. Оҕолорбут өрүү даҕаны библиотека ыытар тэрээһиннэригэр кыттар, сылдьар, элбэх кинигэни ааҕан киэҥ билиилээх дьон буолалларыгар баҕарабыт!
