Күммүт уһаан, халлааммыт сылыйан, сандал сааспыт сандааран тиийэн кэлбитинэн, Боотулуу нэһилиэгин «Радуга» оҕо уһуйаанын иитиллээччилэрэ, бу сылга бастакыларын библиотекаҕа ыалдьыттаатылар. Өрүү буоларын курдук, аан маҥнай оҕолор библиотекаҕа сылдьыы сүрүн быраабылаларын кытта билистилэр. Боотулуу библиотеката ким аатын сүгэрин, Г. И. Поскачин диэн киһи олорон ааспытын туһунан сэргии иһиттилэр.
Салгыы оҕолор Мария Николаевна Матахова аатын үйэтитэр үлэ чэрчитинэн ыытыллар чабырҕах күрэҕэр кыттаары сылдьалларын туһунан сонуннарын кэпсээтилэр. «Уордаах уол, охсуһуук оҕо» диэн Маарыйа Матаахаба чабырҕаҕын библиотекарь ааҕарын бэркэ чуумпуран олорон сэргээн иһиттилэр. Чабырҕах диэн олус түргэнник ааҕыллыахтааҕын сөхтүлэр, санааларын үллэһиннилэр.
Оҕолор биир-биир кэлэн, формуляр диэн ааттаах, ааҕааччы библиотекаҕа сылдьарын туоһулуур докумуону оҥоттордулар. Олус эппиэтинэстээхтик туттан-хаптан, боччумуран олорон, ааттарын, саастарын, ханнык уһуйааҥҥа сылдьалларын суруттардылар. Ол кэннэ бары былдьаһа-тарыһа, уолаттар үксүлэрэ «Мишуткины сказки-раскраски», «Фиксики», кыргыттар «Принцесса» сурунааллары уларсабыт диэн суруттардылар. Энциклопедиялары наһаа сэҥээрэ көрбүт Антон Никитин сир-дойду оҥоһуутун, айыллыытын туһунан, кыыллар тустарынан билиэн баҕалаах Данил Николаев дьэрэкээн ойуулаах «Кыыллар саҥалара» диэн кинигэлэри уларыстылар. Алдьаппакка, этиллибит кэмҥэ бары бииргэ кэлэн туттарыах буоллулар, кырачааннар баспытаатталара Марианна Александровналыын, Туяра Владимировналыын өссө да өрүү сылдьыах буолан уһуйааннарыгар төнүннүлэр.
Библиотека кыракый күннээҕи сонунуттан кэпсээтибит уонна салгыы биһиги библиотекабытыгар олус үчүгэй, дьэрэкээн ойуулардаах, үөрэтэр-иитэр соруктаах сахалыы саҥа кинигэлэр оҕолорго, төрөппүттэргэ, иитээччилэргэ анаан тиһигин быспакка кэлэ тураллар диэн этэбит. Библиотекаҕа сылдьыҥ, оҕолоргутун сырытыннарыҥ диэн ыҥырабыт!
Биһиги библиотекабытыгар, муус устар ыйга кэлбит. оҕону сайыннарарга уонна оҕо ааҕарыгар аналаах «Айар» кинигэ кыһатын саҥа кинигэлэрин кытта билсиҥ!
https://yandex.ru/profile/111016429581 Айар кинигэ кыһатын сайта
Кинигэҕэ олоҥхо муҥура биллибэт киэҥ эйгэтиттэн тылы туттуу туһунан сурулунна. Киһи уйулҕатын араас хамсааһынын бэлиэтиир өйдөбүллэри олоҥхо тылынан арыйан көрдөрүү, сиэрдээх хамсаныыны ойуунан дьүһүйүү оҕолор олоҥхону үөрэтэллэригэр көмөлөөх буолуо.
тылдьыкка сахалыы 99 өс хоһоонун суолтата, нууччалыы тылбааһа киирдэ. Ааҕааччы интэриэһин тардарга анаан өс хоһоонноро көрүдьүөс ойууларынан көрдөрүлүннүлэр.
Хомуурунньукка көрдөөх, хамсаныылаах, спорт көрүҥэ буолбут, остуолга оонньонор төрүт оонньуулар уонна иитээччилэр бэйэлэрэ айбыт оонньуулара түмүллэн киирдилэр. Хас биирдии оонньуу ис хоһоонун видео нөҥүө «Меморис» сыһыарыыны хачайдаан көрүөххэ сөп. Оонньуулар иитэр-үөрэтэр өрүттэрэ оҕону төрүт өйдөбүллэргэ, сиэргэ-майгыга уһуйуохтара, этин-сиинин, булугас өйүн, айар дьоҕурун, алтыһар сатабылын сайыннарыахтара. Кинигэ төрөппүттэргэ, оҕолорун кытта бииргэ оонньонор, иллэҥ кэми көхтөөхтүк атаарарга, дьиэ кэргэҥҥэ исиҥ эйгэни тэрийэргэ күүс-көмө буолуоҕа, оттон иитээччилэргэ, учууталларга араас дьарыктары, күрээхтэһиилэри тэрийэн ыыталларыгар туһалыаҕа.
Ойуулуур-дьүһүннүүр ускуустуба, иис-уус — өбүгэлэрбитин утумнаан кэлбит үгэспит. Билиэн-көрүөн баҕалаах оҕо бу кинигэттэн маһы ыллатар, хаамтарар дьоҕурдаах уустарбыт сөбүлээн туттар мастара ханныгын, саха норуота туоһу тоҕо ытыктыырын, тоҕо таҥас-сап харысхал бэлиэлэрдээх буоларын, оһуор-мандар суолталарын уонна да атын элбэҕи билиэҕэ.
Бу халандаарга сыл хас биирдии күнүгэр аналлаах 365 задача баар. Онтон күн аайы биирдии задачаны суоттаатаххытына өйгүт сайдыа, санааҕыт сааһыланыа. Кинигэ дьиэ кэргэн иллэҥ кэмин көдьүүстээхтик атаарарга туһалыа. Элбэхтик дьарыктанан, өй үлэтин умсулҕаныгар ыллараргытыгар баҕарабын.
Библиотекаҕа көрсүөххэ диэри!
