Бүгүн ыам ыйын 27 күнүгэр, Россия маҥнайгы президенэ Борис Ельцин 1995 сыллаахха көҕүлээһининэн, Россияҕа бибилитиэкэ күнүн бэлиэтиибит. Бу бэлиэ күн дойдубутугар наука, үөрэҕирии уонна култуура сайдыытын кэрэһэлиир.Сылын аайы библиотека күнүн көрсө дойдубут үрдүнэн “Библионочь” акция ыытыллар. Акция сыала соруга: библиотека аҥардас кинигэ эрэ уларсарга аналлаах буолбатаҕын, бу дьону түмэр, саҥа сатабылы, билиини ылар сир буоларын мэктиэлиир тэрээһин. Онно олоҕуран, бүгүн Боотулуу нэһилиэгин модельнай библиотекатыгар БИБЛИОНОЧЬ акция түмүктүүр тэрээһинэ буолан ааста. Акция бастакы тэрээһинэ ыам ыйын 25 күнүгэр «Кинигэ күүһэ» диэн сетевой акцияҕа кыттыыны ылбыппытыттан саҕаламмыта. Нэһилиэк баһылыга Петр Анатольевич Саввинов кэлэн, сахалыы сиэр-туом, ойууттар, удаҕаттар тустарынан кинигэни орто сүһүөх оскуола оҕолоругар ааҕан иһитиннэрдэ. Оҕолор сэҥээрэн иһиттилэр, түмүккэ Петр Анатольевич оҕолорго, саха буолалларын умнубакка, сиэри-туому ханна баҕар сылдьан тутуһалларыгар баҕарда. Бары кыттыбыт оҕолор «Кинигэ күүһэ» акция сертификатын туттулар.
баһылыга П. А. Саввинов
Салгыы 5-9 кылаас оҕолоро «Бастыҥ ааҕааччы» аатын ылар иһин күрэхтэстилэр. Педагог-библиотекарь Ольга Михайловна Долгунова, чиэппэр аайы ыытар Ааҕыы чемпионатын түмүгүнэн үрдүк көрдөрүүлээх оҕолор талыллан бэйэ ыккардыгар куоталастылар. Сахалыы, нууччалыы кэпсээннэртэн быһа тардан аахтылар, сахабыт сирин биллиилээх поэттарын хоһооннорун дорҕоонноохтук ааҕан иһитиннэрдилэр. Дьүүллүүр Сүбэ састааба үс киһиттэн турда: оскуола библиотекара О. М. Долгунова, саха тылын уонна төрүт култуура учуутала Иванова С. Н., нэһилиэк библиотекара М. Н. Лазарева. Кыайыылаахтар Оҕо ыһыаҕын күнүгэр наҕараадаланыахтара.
Онтон ыам ыйын 26 күнүгэр маҥнайгы кылаас оҕолоругар библиодень буолла. Кырачаан ааҕааччылар библиотеканы кытта билистилэр, слайданан викториналаатылар, пазл таҥнылар уонна кыһаллан туран «Мой красивый формуляр» диэн ааттаан библиотечнай формулярдарын тастаатылар. Библиотека туох туһалааҕын, быраабылалааҕын кэпсэттибит. Араас дьэрэкээн кинигэлэр баалларын сөҕө көрдүлэр, аахтылар. Кылаас салайааччыта Иванова Анна Захаровна оҕолорун кытта өссө да кэлиэх буоллулар. Оҕолор баралларыгар кинигэ, сурунаал уларсан, кэмигэр аҕалыах буолан астынан тарҕастылар.
БИБЛИОНОЧЬ-2023 тэрээһин түмүктүүр үөрүүлээх күнэ ыам ыйын 27 күнүгэр киэһэ 5 чаастан саҕаланна. Нэһилиэк Далбар Хотуттара, эдэр ийэлэр, эбэлэр кэлэн сахалыы киинэ көрдүлэр, астына сэлэстилэр, минньигэс остуол мааны ыалдьыта буоллулар. Фотозонаҕа хаартыскаҕа түстүлэр, кинигэ уларыстылар. Бу тэрээһин үөһэ этиллибитин курдук, библиотека аҥардас кинигэ эрэ уларсар сир буолбатын, өссө да атын сынньалаҥҥа сөптөөх тэрээһиннэр буолалларын мэктиэлээтэ. Ыалдьыттар наһаа астыннылар, инникитин да маннык сынньалаҥ киэһэлэрин тэрийэрбитигэр баҕа санааларын эттилэр.
Библиотекарь М. Н. Лазарева
