Кэрэ аҥардарга анаан “үрүҥ санаа поэта” Василий Тарасович Сивцев хоһооннорунан кыракый хомуурунньугу, кэлэн иһэр маҥнайгы сааскы бырааһынньыгынан, бэлэх уунабыт!

Үчүгэйкээн кыргыттар

Үчүгэйкээн кыргыттар

Үрүйэ курдук сырдыктар,

Үрүҥ былаат бааммыттар,

Үкчү хопто курдуктар.

Үүнүүлээх мэччирэҥҥэ

Үүрэллэр ынахтарын,

Үрүлүйэ уһун күҥҥэ

Үлэлииллэр күөх сайын.

Үс мас күрүө быыһынан

Үөрэн-көтөн ааһаллар,

Үүттүгэнээх сайылыктан

Үрүҥ илгэни баһаллар.

Үчүгэйкээн кыргыттар

Үрдүлэринэн көтөллөр

Үөрүүнү көтөҕөннөр,

Үөр субан туруйалар.

Үчүгэйкээн кыргыттар

Үлэ кэннэ үҥкүүлүүллэр,

Үлэһит киппэ уолаттар

Үчүгэйдии үһүлэр.

1975 с.

Надежда

Көстө түһүүй күлбүтүнэн

Көрдөөх үтүө сарсыарда.

Эдэр сааһым тыгар күнэ –

Тапталлааҕым Надежда.

Сүүрэн тиийэн кууһан ылыам

Таптыыр бэйэм үөрүүбэр,

Тохтообокко ырыа ыллыа

Дьоллоох сүрэх мин түөспэр.

Алыс нарын эн уоскуттан

Ахтан күүскэ мин ууруом,

Арыл хара хараххыттан

Эрэл уотун мин булуом.

Көстө түһүүй күлбүтүнэн

Көрдөөх үтүө сарсыарда,

Эдэр сааһым тыгар күнэ –

Тапталлааҕым Надежда.

1954 с.

Өр да буолла эйигин

Биир сөрүүн киэһэ көрбүтүм,

Эдэркээн нарын бэйэҕин

Соһуччу көрөн сөхпүтүм.

Ойуурга чыычаах ыллыыра,

Хонууга ньургуһун тыллара,

Үрүйэ уутугар талбаара

Күлүгүҥ кубалыы устара.

Аттыгар турар тэтиҥнэр

Атылыы көстөр этилэр,

Сир үрдүн сиппит симэҕэ

Силэллэн, суол биэрэн иһэрэ…

Көрүстүм бүгүн эйигин,

Булбатым урукку кэрэҕин.

Эдэргин, ыраас мичээргин

Оҕоҕор, олоххор биэрбиккин.

1959 с.

Эн

Эн – кыталык үҥкүүтэҕин,

Маҥан куба куорсунаҕын,

Таала хонуум күөрэгэйэҕин,

Тахсар күн сардаҥатаҕын.

Эн – саҥа түспүт ыраас хааргын,

Эн – күһүҥҥү сөрүүн сүөгэйгин,

Былыта суох дьэҥкир халлааҥҥын,

Быыкайкаан оҕо мичээрэҕин.

Эн – дыргыл сыттаах мутукчаҕын,

Эн – толору кымыстаах чорооҥҥун,

Эн – сырдык санаа кынатаҕын.

Эн – долгуйар уһун суһуоххун,

Эн – ол аата дьолум, эрэйим.

Мин ыллыыр ырыам эбиккин.

1963 с.

Кэрэ дьахтар

Үрүҥ былыттыы долгулдьуйар

Маҥан таҥаска дьахтар сытар.

Күн бастакы сардаҥаларыгар

Көмүс суһуоҕун суунан уһуктар.

Кэрэ дьахтар хамсаммытыгар

Хос иһэ тилиннэ, киэркэйдэ.

Бэс ыйын ыраас халлааныгар

Күөрэгэй ырыата дьиэрэйдэ.

Аһаҕас түннүгүнэн иһиллэр

Ынахтар маҥыраһыылара,

Ыанньыксыт тиэтэйдэ үлэтигэр,

Оҕото уһуктан хаалла.

1983 с.

Бүлүү кыргыттара

Бүгүн Бүлүү кыргыттарын

Хаамар үрдүк кырдалларын,

Кыыһар имнээх сарыалларын

Көрө үөрэн ыллыыбын.

Бүлүү мааны кыргыттарын

Намыын, наҕыл куоластарын

Хоту Дьааҥым тыалын тыаһын

Отой умнан таптыыбын.

Бүгэн сыппыт бүтэй Бүлүү

Кындыа, кылыс кыргыттарын

Кыталыкка тэҥнээн өрүү

Соҕуруубун умнабын.

Бүлүү үөмэх долгуннарын,

Кумахтарга кыргыттарын

Көрдөхпүнэ мин умнабын

Илиҥҥибин, арҕаабын…

Бүлүү, Бүлүү, мөлбөһүйэ

Устар улуу дьылҕалааххын.

Дьиҥэр, бэйэҥ үүнэр үйэ

Кэрэ кыыһа буолаҕын.

1976 с.

Дьахтар…

Дьахтар баар буоллаҕына,

Дьиэ сэргэхсийэ түһэр.

Хос иһэ хомулуннаҕына

Бырах санааҥ сүтэр.

Сибэкки сыта уратытык

Утуйар хоско дыргыйар.

Саҥарар саҥаҥ да атыннык

Тупсубут курдук дуорайар.

Саҥа хаар кыыдамнаатаҕына

Алаас иһэ сырдыырыныы,

Дьахтар баар буоллаҕына

Ырааһы эрэ саныыгын.

Дьахтар баар буоллаҕына

Чыычаах, оҕо саҥата элбиир –

Ол аата олоҕуҥ ис хоһооно

Дьолунан туолан дириҥиир.

Дьахтар баар буоллаҕына

Бүтүн бэйэҕин аныыгын.

Намтатыма кинини хаһан да –

Таҥараҕын, үрдүк айыыгын.

1977 с.

Саха кыыһа

Куруһубаҕа сууланан

Куба маҕан кыыс сытар.

Күн сырдык сардаҥатынан

Күөгэйэр моонньун кууһар.

Оо, билиҥҥи саха кыыһа,

Принцесса курдуккун –

Олоҕуҥ былыта суох халлаана

Кими баҕарар умсугуттун!

Төрөппүттэриҥ – улуу Лена,

Муустаах муора ааттаахтар,

Кыһыл көмүс хайа троҥҥа

Алмаас хоруоналаахтар.

Эн, баҕар, санаарҕыаҥ,

Бүлүү өрүһүн уутунуу,

Кэрдиллибит үрүҥ хатыҥ

Тостубут мутугунуу.

Ол эрээри эн дьылҕаҥ

Күүстээх аналын билэҕиэн?

Саха хаанын уһатан

Үйэлэргэ эн тиэрдиэҥ.

Саха кыыһа, утуй, сынньан,

Сардаҥаҕа сууланан.

Эйигин күүтэр үрдүк анал,

Эймэнитэр имэҥ, таптал.

1989 с.

Таптыыр дьахтарым

Кырдалга сандаарар ньуругуһун чөмөҕүн

Сүрэҕим долгуйа күндүтүк көрөбүн.

Аралдьыйан да истэрбин, мин өйдүүбүн

Умнуллубат түгэни, сүппэт көстүүнү.

Ханна да сылдьыбытым иһин эн бааргын –

Айылҕа хатыламмат айымньытаҕын.

Бэркиһиибин: хайдах миигин тулуйаҥҥын

Соҕотох олоххун миэхэ анаабыккын.

Көөнньүбүт кымыстыы уохтаах эдэр сааспар

Угуйар этилэр умсулҕаннаах айаннар.

Сылайарым, бутулларым муҥутахпар,

Онтон эн мэлдьи баар буоларыҥ аттыбар.

Былаҕайга былдьатан, умнуллан сүтүөхпүн

Быыһаабытыҥ биллэр, таптыыр дьахтарым,

Олох тимир мискиирин эн саҕа көрсүбүтү

Отой да билбэппин, эрэллээх тапталым.

Хараҕыҥ анныгар сүппэт дириҥ дьураалар

Хаһыҥнаах кэммит чугаһаабытын этэллэр.

Сылаас мичээргэр күннээҕи сылааҥ кыттыһар,

Хаһан да бараммат түбүктэр элбииллэр.

Дьахтар барахсан улуу аналын өйдөөн,

Дьалкыйбат уулаах таас иһит курдук тутан,

Үйэтин уһатар үтүө дьаһалы көрдөөн,

Хаһан биһиги тэҥнэһэбит ытыктаан?..

Миэхэ хаһан да үтүөмсүйбэккэ эрэҕин,

Судургу майгыгынан ис куппун тутаҥҥын

Билигин да инники сиэтэн иһэҕин,

Олоҕум сырдык күнэ – таптыыр дьахтарым.

1990 с.

Кыргыттар

Эйигин билсэммин

Эйгэбин кэҥэттим.

Халлааным үрдээтэ –

Хамсаныым элбээтэ.

Аттыбар тураллар

Арылхай сулустар,

Сандаара саҕаллар

Саһархай харахтар.

Аттыбар эрээри –

Ардыгар ыраахтар,

Түспэттэр сирдээҕи

Түүҥҥү тот ардахтар…

Чаҕылҕан курдуктар

Чаҕылхай кыргыттар,

Тыллара уоттаахтар,

Тыынарбат уохтаахтар.

Кыргыттар, кыргыттар

Таабырын курдуктар,

Нуолур түү курдуктар,

Уот тимир курдуктар…